Дали конечно ќе се искористи потенцијалот на водородот како гориво?

Истражувачи од Универзитетот на Нов Јужен Велс во Австралија за првпат покажаа дека водородот може да биде ослободен и повторно апсорбиран од посебен материјал, со што се надминува една голема пречка во употребата на водородот како алтернативно гориво.

Имено, научниците создале наночестички од натриум борохидрид, соединение кое многу често е запоставено при вакви истражувања, а потоа врз нив е нанесена обвивка од никел. Оваа еднинствена наноструктура од јадро и обвивка се покажа дека има одлични својства, особено за складирање на водород, како и негово ослободување при многу пониски температури отколку што досега тоа беше случај.

-Никој досега не се обидел да ги направи ови честички на толку минијатурно ниво бидејќи се сметаше дека е претешко да се изведи. Но, ние успеавме  и покажавме дека водородот може да се складира во натриум борохидрид и на температура погодна за практична употреба – вели д-р. Kondo-Francois Aguey-Zinsou, професор на Факултетот за хемија и дел од истражувачкиот тим.

Иако одамна се смета за гориво на иднината со кое би се напојувале од згради и возила, до преносни електронски уреди, практичната употреба на водородот не беше можна досега заради ограничувањата на технологијата за негово складирање.

Лесните соединенија познати како борохидриди (вклучувајќи и соединенија на литиум и натриум) се познати како ефикасни апсорпциони материјали, но се веруваше дека откако еднаш ќе ја ослободат енергијата, таа не може повторно да биде апсорбирана, што претставува големо ограничување. Заради тоа ретко кој досега обрнувал внимание на натриум борохидридот. Но, резултатите од ова истражување покажаа дека процесот е сепак реверзибилен.

Истражувачите забележале неверојатни подобрувања во термодинамичките и кинетичките својства кај овој материјал. Имено, хемиските реакции кои се одвиваат за време на ослободувањето или апсорпцијата на водородот се одвиваат многу побрзо отколку кај претходно проучувани материјали и на многу пониски температури. Во својата нормална форма, натриум борохидридот мора да се загрее на температура од 550°C само за да го ослободи водородот. Дури и во форма на наночестичка подобрувањата биле минимални. Но, со новата структура на јадро и обвивка, забележано е минимално ослободување на енергија дури и на 50°C, додека значително ослободување се јавило на 350°C.

-Со контролирање на големината и архитектурата на овие наноструктури, ние можеме да ги нагодиме нивните својства и да ги направиме реверзибилни. Сега знаеме како да ги искористиме сите борохидридни соединенија, што е особено важно, бидејќи ќе можат да се користат како горива кај возилата – нагласува д-р. Aguey-Zinsou.