- ВОВЕД
Подобрување на енергетската ефикасност најмногу се применува во објектите (зградите). Голем учинок во тоа има топлинската изолација преку примена на термоизолациони материјали, но и примената на уреди кои штедат енергија. Во таа група уреди се вбројуваат топлинските пумпи кои се користат за ладење/греење простор. Зголемувањето на ефикасноста на системите за ладење/греење со топлинска пумпа се постигнува доколку таа е електрично напојувана од ФВ систем. Имено, при ладење(во летните месеци), дијаграмот на потрошувачка на електрична енергија може да се смета дека е во корелација со производството од фотоволтаичните (ФВ) системи, а при греење (во зимскиот период), ФВ систем делумно ќе служи за напојување на топлинската пумпа.
1.1 Општо за топлински пумпи
Терминот и патентирањето на топлинските пумпи се актуелизира во далечната 1927 година. Статистичките податоци говорат дека до 2010 година, на светско ниво се инсталирани над 800 милиони топлински пумпи.
Заштедите на електрична енергија со топлински пумпи, споредено со конвенционалните уреди за ладење/греење (електрични печки, сплит системи), достигнуваат и до 60%. На пример, за потрошен 1kWh електрична енергијаод топлинските пумпи се добива 3kWh топлинска енергија, бидејќи 2kWh се одземени од околниот земја, вода или воздух.
1.2 Видови топлински пумпи
Изворот на топлина кај топлинските пумпи може да биде: земја, вода или воздух. За постигнување на ефектот ладење/греење, одземената топлина независно дали е тоа од земја, вода или воздух, се предава на работниот медиум во системот за ладење/греење. Од овде следуваат и основните изведби на топлински пумпи, а тоа се: земја/вода, вода/вода и воздух/вода.
- ЕЛЕКТРИЧНО НАПОЈУВАЊЕ НА ТОПЛИНСКА ПУМПА СО ФВ СИСТЕМ
Најголеми заштеди при експлоатацијата на топлинските пумпи се постигнуваат доколку електричното напојување на компресорот на топлинската пумпа се врши со ФВ систем, како на слика 1.
Слика 1 Топлинска пумпа земја/вода електрично напојувана од ФВ систем
Од причини што целата произведена електрична енергија се искористува во истиот момент, не е предвидено нејзино складирање во акумулаторски батерии. Со други зборови, ова укажува на значително смалување на цената на инвестицијата, што од друга страна го прави овој системрентабилен за експлоатација. Градежните материјали (цементна кошулка, тули), ја превземаат улогата на акумулатори кои со својот топлински капацитет акумулираат топлина.
Уште поголеми резултати кај овие системи се постигнуваат со т.н. „панелно ладење/греење“ (подно, ѕидно, таванско), кое работи на ниски температури.
- ТЕХНО-ЕКОНОМСКА АНАЛИЗА
Бидејќи станува збор за нискотемпературен систем, кој работи на температури до 350C, потребната моќност за ладење/греење е 60-70W/m2. Оваа вредност се однесува на објект со добра изолација.
На пример, за стамбен простор од 100m2, со интегрирани површински системи за ладење/греење кои работат на ниски температури, соодветна е топлинска пумпа со моќност од 7kW.
Електричната моќност на топлинска пумпа со топлински капацитет 7kW е приближно ~2kW, а тоа значи дека инсталираната моќност на ФВ системот треба да биде со таа моќност.
Табела 1. Чинење на системот
Опис на инсталација | Цена на чинење (eur) |
Tоплинска пумпа, воздух/вода, 7kW | 3.000 – 4.000 (зависи од квалитетот) |
Инсталација на површински системи | 2.500 – 3.000 (зависи од квалитетот) |
Инсталација на ФВ систем (без акумулаторски батерии) | 2.000 (зависи од квалитетот) |
Вкупна цена на инвестцијата | 7.500 – 9.000 |
- ЗАШТЕДИ
Просечните сметки за една грејна сезона за стамбен простор од 100m2, достигнуваат и до 1.000eur/грејна сезона. Греење на истиот овој простор со топлинска пумпа и подно, значи намалување на сметките за една грејна сезона и до 40% или 400eur, имајќи ги во предвид заштедите кои се постигнуваат со топлинска пумпа. Но, во случајот се работи за топлинската пумпа чиј компресор е електрично напојуван од ФВ систем, а тоа значи минимум уште 10% заштеди. Во тој случај сметките за греење би биле 50% пониски од претходните, oние по 1000eur.
Од домашниот буџет за ладење во летните месеци се издвојуваат значителни средства или во просек 200 eur/сезона и тоа најчесто за ладење само на дневниот простор.
Доколку ладењето се врши со топлинска пумпа, температурите би биле исти низ целиот објект. На пример, сметките за ладење на овие 100m2, со заштеда од 40% би изнесувале 120 eur. Но, имајќи предвид дека топлинската пумпа во тој период ќе биде електрично напојувана од ФВ системот, и струјата која топлинската пумпа ќе се троши е во корелација со онаа која ФВ генераторот ја произведува, значи дека ладењето би било бесплатно, или тоа се уште дополнителни 200 еur годишна заштеда.
- ПОВРАТОК НА ИНВЕСТИЦИЈА
Заштедите од овој систем изнесуваат 700 eur/годишно. Повратокот на инвестицијата на системот, доколку се земе предвид вкупната инвестиција (7.500-9.000 eur) би се движел од 10,7-12,8 години, знаејќи дека проектиран работен век на овие системи е 20-25 години.
- ЗАКЛУЧОК
Зголемувањето на цената на енергијата резултира со изнаоѓање нови алтернативни решенија за нејзино добивање. Континуираното исцрпување на природните резерви на конвенционалните извори наведува на користење обновливи извори. Инсталирање на системи кои во своето работење користат обновливи извори, како системот кој е опишан во овој труд, значи заштита на животната средина од штетни CO2 емисии и заштеди од економски аспект.
4 Comments
Митко
Почитувани.
Ве молам за информација, која фирма може да инсталира ваков ФВ систем за напојување, потребен би бил капацитет до 5KWh.
– Дали има потреба од дозволи, лиценци, договори (со државата или ЕВН) ако целата произведена ел. енергија се користи за сопствени потреби?
Наталија Јованова
Почитуван Митко,
на нашиот пазар постојат фирми кои се занимаваат со продажба и инсталација на ФВ системи.
Можам да Ви препорачам некои од нив кои нудат квалитетна опрема.
За инсталирање автономен ФВ систем (за споствени потреби), нема апсолутно никаква потреба од дозволи, лиценци…
Системот опишан во овој труд, претставува спој од два системи:
1. Термотехнички инсталации (топлинска пумпа, подно и таванско греење/ладење)
2. ФВ систем без акумулаторски батерии
Прво треба да се направат пресметки, колку е потрошувачката на електрична енергија на компресорот од топлинската пумпа и врз база на тоа да се димензионира соодветен ФВ систем, кој ќе може да ги задоволи тие барања и во најголем дел од времето да го напојува компресорот на ТП.
Доколку ја имате таа база на податоци, димензионирањето на ФВ системот ќе се направи лесно.
Капацитетиот на ФВ системот е во сооднос со капацитетот на топлинската пумпа која па се бира зависно површината во објектот која е планирано да се грее/лади.
Доколку имате други прашања слободно контактирајте ме и на мојот мејл natalija.jovanova@yahoo.com
Пријатен ден,
Наталија Јованова, дми
Dejan
почитувани
Сакам да инвестирам во проект обновливи извори на енергија ФВ инсталација од 30-40 KWh
ми треба кратка информација што ми треба од документација и колкава би била инвестицијата и кратка пресметка на добивка..
однапред благодарам
Предраг Стојковски
Здраво Дејан,
Постапката за инвестирање во сончева централа можете да го видите на следниот линк:
https://www.ea.gov.mk/images/stories/E_Izdanija/Priracnici/Priracnici_MK_PDF/Priracnik_za_fotovoltaici.pdf
За опрема нашата препорака се копаниите КВАЗАР и СОЛАР НРГ.
Поздрав!