Изминатиов период, од аспект на подолга временска дистанца, беа донесени многу интересни закони, измени и дополнувања на закони, одлуки и правилници. Процедурата за нивното донесување, нема да ја коментирам. Бидејќи овој блог е за енергетска ефикасност, ќе се задржам конкретно на Правилата за снабдување со топлинска енергија, наспроти Законот за енергетика, а потврдени со Одлука на Уставниот суд. Да, НАСПРОТИ Законот за енергетика, во овој текст.
Спорниот член 53 став 2 од Правилата за снабдување со топлинска енергија*, како и сите останати членови, се донесени врз основа на член 28 од Законот за енергетика**. Супер што навидум имаат законски основ, меѓутоа согласно наведениот член од законот (како изговор дека основот постои) не е пропишано дека во Правилата треба да бидат содржани и одредби за начинот на регулирање на наплата на надоместок за ангажирана моќност (?!) или наплата на емитиран дел од топлината (?!) од страна на ИСКЛУЧЕНИТЕ ПОТРОШУВАЧИ. Ако аргументот за чл 53 ст 2 од Правилата е чл 28 ст2 т2 и т10 од Законот***, го повикувам оној кој ги составувал правилата да објасни јавно дали испорачана и емитиран дел од топлинска енергија е исто. Покрај тоа, би било фино да кажам дека конкретниот став за кој претпоставувам дека е измислениот основ, се однесува на операторот на преносниот систем и операторот на системот за дистрибуција, а никако и на снабдувачот со топлинска енергија, кој е врската во целиот тој систем од потрошувачот се до производителот и УСЛОВИТЕ ОД ДОГОВОРОТ што не се исполнети. За да биде уште поинтересно, конкретниот член од законот пропишува дека во Правилата треба да бидат содржани одредби за заштита на потрошувачите.
Ако вака се заштитуваат потрошувачите, тогаш ајде да ги поставиме работите обратно. Зошто да не му се плаќа на ИСКЛУЧЕНИОТ ПОТРОШУВАЧ надомест за стварна службеност? Нели цевките поминуваат низ неговиот стан, тој не ги користи нивните услуги, а сепак му узурпираат дел од површината од станот, исто толку колку што тој „користи“ дел од емитираната топлина? За ова подоцна, но сепак морам и сега да ги прашам регулаторите за нивните ставови.
Правилата за снабдување со топлинска енергија се подзаконски акти, чија основа е Законот за енергетика. Во текстов нема да се задржувам само на членот 28 од Законот. Снабдувањето со топлинска енергија е енергетска услуга. Според член 3, кој ги дава основните дефиниции за енергетиката и се што се подведува под овој поим, а конкретно точка 32****, многу јасно пропишува дека за користење на енергетска услуга услов е да постои договор. Исклучените потрошувачи, во најголемиот дел се исклучени поради тоа што ГО РАСКИНАЛЕ ДОГОВОРОТ, за што повторно ќе го потсетам регулаторот, БИДЕЈЌИ ДОГОВОРОТ Е РАСКИНАТ ПОВЕЌЕ НЕ ПОСТОИ ОСНОВ ЗА КОРИСТЕЊЕ НА ЕНЕРГЕТСКАТА УСЛУГА – СНАБДУВАЊЕ СО ТОПЛИНСКА ЕНЕРГИЈА. За сега, нема да навлегувам во облигациите.
Само уште едно мало потсетување, повторно со повикување на Законот за енергетика, прописите кои ги донесува или ги одобрува по предлог на операторите регулаторното тело треба да обезбедат: „ заштита на потрошувачите и корисниците од злоупотреба на доминантна позиција на пазарот и неоправдано високи цени и тарифи “ (чл 24 ст 4, т2), гарантирано патем и со Уставот, како забрана за искористување на монополската положба, а не нејзино зацврстување.
За крај, ако плаќаме за топлењето на ѕидовите поради парното од соседот, во зима, дали може соседот, во лето, да ни плаќа за ладење на истите поради нашите клима уреди? Или пак темата што допрва ќе биде интересна – дали непушачите ќе плаќаат дел од цената на цигарите што ја даваат пушачите, поради „емитирање на дел“ од никотинот во форма на јаглерод моноксид?
* Исклучените потрошувачи од став 1 на овој член се задолжуваат со плаќање на надоместокот за ангажирана моќност (фиксен дел) од надоместокот за топлинска енергија, кој се определува согласно тарифниот систем за топлинска енергија. – член 53, став 2 од Правила за снабдување со топлинска енергија, РКЕ, 30.07.2012 година.
** ЗАКОН ЗА ЕНЕРГЕТИКА Службен весник на РМ, бр. 16 од 10.02.2011 година, со соодветната измена и дополнување од 03.10.2011 година.
*** начинот на пресметка, фактурирање и наплата на испорачаната енергија или природен гас и услугите за користење на преносните, односно дистрибутивните мрежи – член 28, став 2, точка 2, ЗАКОН ЗА ЕНЕРГЕТИКА Службен весник на РМ, бр. 16 од 10.02.2011 година, со соодветната измена и дополнување од 03.10.2011 година
**** Енергетска услуга е услуга со која се остварува физичка корист, средство или добра како резултат на користењето на енергијата со примена на енергетски ефикасни технологии и/или активности што вклучуваат постапки за управување, одржување и контрола при обезбедување на енергетската услуга, а се остварува ВРЗ ОСНОВА НА ДОГОВОР и за која може да се докаже дека, при нормални услови, придонесува за подобрувања на енергетската ефикасност и/или заштеда на енергија што можат да се измерат или проценат.
One Comment
Ловро
Зашто настанува спорот со испорака на топлинска енергија и со иклучуванјето, треба да се расчистат некој технички работи , топлината има своја мерна единица , за мерње постојат мерни инструменти калориметри, како што има за струјата , за водата , топлината не се мери во м2 (во површина)Секој купувач мора да знае што плаќа, а тоа што соседот не се грее ,тоа е негова работа нема да плаќа ако не троши.За топлината што преваѓа од тој што се грее према тој што не се грее треба да се стави изолација, Полно станови сигурен сум ќе греат само една соба или предпладне се на работа нема да греат ќе штедат и т.н има полно можности за штедење овој народ е домаќински народ а и тоа е демократја дирекно претворена во денари само треба да му ја овозможиме.