Ѕид-изолатор и ѕид со поголема термална маса
Многумина од нас кои престојувале во старите куќи направени од масивни камени ѕидови знаат дека во таквите куќи температурата е прилично добра (ладно во лето, топло во зима). Денеска при градбата сè почесто се користат материјали кои повеќе ја изолираат топлината, отколку што ја складираат. Обложувањето на објектите со термоизолатор како што е стиропорот, ја подобруваат енергетската ефикасност, но има уште еден трик кој треба да го научиме ,а тоа е термалната маса.
Термалната маса значи дека масата на една зграда обезбедува инерција против температурни флуктуации, тоа е зошто шаторот на пример може да се загрее речиси веднаш на сонце додека пештерите или подрумите остануваат ладни во текот на денот или целата година.
Но, колку свежина можете да чувате во вашата куќа? Дали тоа само зависи од количината на воздух која се содржи во него? Зошто некои куќи остануваат поладни од другите во текот на летни денови? Зошто некои простории брзо се ладат во текот на зимските месеци по исклучување на греењето?
Одговорот лежи во насловот на овој напис: Термичка маса. Доколку направите пресметка на волуменот на воздухот содржан во вашата соба, може лесно да пресметате дека таква количина воздух може да ја загреете на пример од -10 на 25 степени целзиусови со онолку енергија колку што се доволно да се направат 12 кафиња. Малку, нели?
Е сега трикот е во останатата термална маса (ѕидови, под, објекти) која исто така треба да се затопли на истата температура. Сега можете да видите зошто во типична куќа може да ви биде удобно барем во првите неколку часа на жешок есенски ден, додека шатор со еднаква големина ќе почне да крчка во рок од само неколку минути на изложеност на сонце.
Модерните живеалишта сè почесто се прават со силна надворешна изолација и обични гипсени ѕидови. Подовите многу често се изолираат за да овозможат брзо затоплување на просторот. Ваквите објекти имаат мала термичка маса, и на тој начин бараат константно трошење на енергија за одржување на температурата.
Доколку додадете дополнителна термална маса на вашиот дом тоа може да смени многу, во однос на удобноста на вашето живеење. Имено, ваквата термална маса во летните месеци ќе ја држи температурата здобиена во текот на ноќта преку целиот ден, додека во зимските ноќи ќе ја продолжите топлината украдена од кратките денови. На овој начин ќе заштедите на греење/ладење, а со тоа и на сметките за електрична енергија. Еве неколку совети како да ја зголемите термалната маса на вашиот дом со едноставни чекори:
- Заменете ги теписоните со дрвен под (бродски или паркет, ламинатот не спаѓа во оваа категорија)
- Доколку реновирате, користете бетон, постабилно е и има одлична термална маса
- Користете тули секаде каде што можете
- Поставете гранитни плочки на местото каде грее сонцето во текот на зимските денови
- Вградете камин ако имате можност од такво нешто
- Поставете голем аквариум, водата е одличен материјал со добра термална маса
Имајте на ум дека термичките маси не примаат топлина сами по себе, така да секој момент користете го или да акомулирате топлина во време на зимските денови или да ја намалите температурата за време на свежите летни ноќи преку константна вентилација и размена на топлината.
Во секој случај, бидејќи секој дом е карактеристичен, обидете се да го најдете вашиот начин на креирање на удобност во вашиот дом. Јас лично кога би имал шанса би започнал пасивна куќа со инсталирање на воздушно и водено подно природно греење, куќа насочена кон југ, со добро изолиран север, централен камин, отворен простор и голем аквариум поврзан со внатрешната стаклена градина со мнооогу термална маса. Кој е вашиот сон?
2 Comments
Moebius
Користете тули секаде каде што можете?? Стварно?? Значи стварно ми е смачено од вакви викенд експерти…
Ај сега малце да се објаснам. Да, тулите имаат голема термичка маса. Ама имаат уште една работа, а тоа е голема физичка маса. Во превод – тешки се ко туч.
Еве една мала информација за колегата електро инженер од колега градежен инженер. Целата територија на Македонија е сеизмичка зона. Поготово територијата на Скопје се наоѓа во сеизмичка зона од највисока категорија. Градежните инженери при димензионирање на конструкциите во овие услови се обврзани во предвид да земат и бочен сеизмички товар. Овој товар е во функција од вкупната тежина на разгледуваната конструкција. Во превод – си имаме разни коефициенти и си ги множиме сите нив, за на крај сето тоа да го помножиме со тежината на конструкцијата. Е ај сега колегата електро инженер нека си постави прашање што ќе се случи кога бара од нас во секоја можна прилика да користиме еден од најтешките материјали достапни на пазарот??
Додуше за приземни и/или ниски објекти како индивидуални куќи и има логика сето кажано во текстот. Ама за станбени згради повисоки од 2-3 ката веќе се губи таа логика поради масивноста на конструкцијата потребна да се спротивстави на сеизмичкиот товар предизвикан од сета таа тежина.
Е сега веќе друга приказна е дали заштедата во енергија од користење на тулата како преграден материјал ги оправдува зголемените трошоци за конструкцијата, во однос на лесните преградни материјали. Претпоставувам потребна е подетална и постручна анализа од ова што ни го сервира авторот.
П.С. А дали воопшто е земена во предвид и енергијата потребна да се произведе тулата (ископување на купишта глина, пренесување во фабрика на тие купишта, печење на високи температури), како и транспортот на тони и тони готов производ до крајниот потрошувач) ??
Игор Мишевски
Друже, стварно? Се фати за тулите? Од цел текст?
Првин да се разбереме никаде не тврдам дека сум експерт (и во мојот опис 🙂 нели). Она што е напишано, стојам за тоа. И да пред се мислев на индивидуални објекти, никаде не стои ставајте тули и во зградите (туку секаде каде што може, нели, а во згради неможе секаде) 🙂
„Претпоставувам потребна е подетална и постручна анализа од ова што ни го сервира авторот.“ – Бујрум напиши ја, ќе ја објавиме како гост автор.
Поздрав 🙂