Електронскиот отпад е можеби една од најдебатираните теми во последните неколку месеци во Македонија кога станува збор за еколошките теми и заштита на животната средина. Направени се повеќе проекти за подигање на свеста за опасностите од електронскиот отпад и законот за справување со истиот треба да биде донесен во скоро време. Но, сето тоа запира тука. Еднаш кога кампањата ќе заврши и кога законот ќе биде донесен, сè ќе запре. Граѓаните, колку и да се информирани и свесни за опасностите од истиот, немаат избор што да прават со електронскиот отпад. Комуналните претпријатија како што се сега структурирани не се справуваат со обичниот отпад како што треба, а не со електронскиот кој е доста поспецифичен. Друг момент се оние кои можеби се најодговорни, а тоа се увозниците на електронска опрема и апарати. Досега немаат направено ниедна иницијатива за справување со електронскиот отпад. Исто така, новиот закон за справување со електропнски отпад им оди во прилог и ќе се применува дури за неколку години, така што и по таа основа не се загрижени, а и впрочем и тогаш кој знае дали ќе се применува истиот. Реалноста во Македонија е дека голем број на закони се донесени само за да се донесат, а не за да се применуваат.
Еден од начините да се справите со стар телефон, старо двд или некое друго парче електронска опрема и при тоа да заработите некоја пара е да го продадете на некој надвор од Македонија кој сака да го откупи. Имено, https://www.gazelle.com/ е едно место каде може да пробате да заработите од стариот електронски отпад. Идејата е да проверите преку сајтот дали може да заработите од вашиот отпад. Од кога ќе проверите колку нудат за вашиот е-отпад, го пакувате и го пуштате до кај нив. Потоа тие го проверуваат дали е истото што сте потврдиле дека ќе пуштите и на основа на тоа тие ви ја праќаат договорената сума. Сепак, она што вреди да се спомене е дека не за сите парчиња електронски отпад може да се добијат пари. Затоа прво проверете, па после одлучете што ќе правите. Од она што може да се прочита за овој сервис е дека се сериозни во својата работа и дека ги почитуваат преземените обврски. Сајтот е бесплатен, така што нема причина да видите што можат да понудат за вашиот електронски отпад.
2 Comments
Елена
Повеќе за справување со е-отпадот во Македонија може да се види и на овој линк: https://e-otpad.mk/blog/92-kako-da-se-spravite-so-…
GigaWatt
А локации на таканарачените Е-Отпади? Јас колку што разбрав само фирми кои се регистрирани како е-тпади ја откупуваат оваа роба и потоа се препродава или се размонтирува и пак оди на отпад, само што во овој случај се продава како бакар, алуминиум, што и да е.
Електроничарите хобисти, па и на професионалците (инженерите) често имаат недостаток од електронски компоненти, па се принудени да растураат стари уреди. А често се случува и определена компонента повеќе да ја нема во продажба, па да мораат да ја вадат од стари уреди. Треба да ја воведете можноста луѓе да може да откупуваат опрема од овие отпади, со тоа што јавно ќе ги објавите локациите и имињата на овие отпади (јас дознав за една фирма/отпад кој се има регистрирано како е-отпад, но сосема случајно, во муабет со сопственикот).
Доколку деловите и компонентите се продаваат по прифатливи цени, сигурен сум дека ќе се јават голем број на заинтересирани индивидуи кои би сакале да купат дел од опремата од е-отпадот.
А да не ги спомнувам градовите и помалите населени места во Македонија во кои нема продавнци за електронски компоненти, а има луѓе кои се интересираат за електрониката. Во такви места, единствена залиха на електронски компоненти се стари уреди. Дел од луѓето кои живеат таму се снаоѓаат преку набавка набавка на електронски компоненти преку пријатели од поголемите градови, но дел размонтируваат исправни уреди за да најдат компоненти. Зошто да се размонтируваат исправни уреди кога и онака има е-отпади во кои голем дел од уредите се и онака неисправни и ќе се фрлат, така да, за мала сума на пари може да се откупат од луѓе кои се од помалите населени места. Во тој случај, да, би се исплател патот до отпадот, дури и да е прилично далеку од локацијата во која живеат, бидејќи од само еден CRT монитор (како пример го давам), можете да извадите стотици пасивни и активни електронски компоненти (отпорници, кондензатори, транзистори, интегрирани кола…) кои се далеку од неисправни и може да се реиснкористат во други немеи.