Домот од иднината може нема да има потреба за електрични водови кои носат електрична енергија од некоја централна постројка. Наместо тоа, замислете комбиниран систем за топлина и електрична енергија кој работи на водородни горивни ќелии и ја произведува сета енергија која му е потребна на домот, а не зафаќа простор поголем од еден бојлер. Горивните ќелии работат на водород кој се произведува во електролитски компресор кој се напојува со помош на соларни панели поставени на покривот, правејќи го домот потполно енергетски независен.
Тоа би значело крај на сметките за електрична енергија и крај на прекините на довод на електрична енергија заради дефекти на водовите или на системот. Сета енергија која се користи во домот, од готвење до полнење на мобилниот телефон, би се добивала на самото место. Технологијата која може да го овозможи ова е достапна и денес и веќе се користи во деловни згради или за напојување на недостапни места. Но, според одредени проценки, најголемиот проектиран раст во наредните години ќе биде во резиденцијалниот пазар. Резиденцијалните горивни ќелии се индустрија во пораст со 9000 продадени единици за 2010 година, што претставува раст за 60% во однос на 2009, а се очекува таа бројка да достигне 1.2 милиони единици до 2017та.
И покрај предвидениот раст, оваа индустрија има некои пречки кои мора да ги помине. Потребна е стандардизација на технологијата, намалување на цената на производство и поголема промоција на горивните ќелии. Ако сепак ваков соларно-водороден хибриден систем за напојување на домот стане стандард, користа од него би била повеќекратна: би се подобрила енергетската ефикасност, придонесува во зачувување на околината, помали торшоци за сметки и голем удел во децентрализацијата на електроенергетскиот систем.
Идејата е стариот систем, кој постои уште од првите денови на производство на електрична енергија, каде една голема електрична централа снабдува огромен број на корисници, да се замени со самоодржливи, енергетски независни домови.
2 Comments
Дип.ел.инг.
Идејата е многу одамна позната и истата е масовно експлоатирана на одалечените фарми во комбинација со искористувањето на ветерната енергија. Основна слабост на оваа идеја е дека воглавно користи вода за енергент иа таа е премногу потребна за човекот.
Обрнете внимание на Горивните ќелии со тврд електролит или со течен електролит кои како енергент ги користат штетните гасови кои согоруваат и произведуваат директно електрична енергија.
Диететичар
Ако веќе сме инвестирале во фото-волтаични колектори кои произведуваат електрична струја и истата можат да ја складираат во батерии (акумулатори), тогаш зошто струјата да се троши за производство на водород? Нели при секое претварање имаме загуби? Или можеби не?
Мислам дека побезбедно е да се произведува струја одколку водород, а барем денес има одлични батерии кои можат да издржат и 5-6 илјади циклуси доволни за следните 20 години (баш исто време за кое соларните колектори ќе паднат на 80-90% ефикасност)
Вака само ги комплицираме работите и беспотребно ја зголемуваме почетната инвестиција…