Се посветува сè поголемо внимание на зелените градби

Пазарот на зелени градби во светски рамки незапирливо расти, според заедничката студија на двете компании McGraw-Hill Construction и United Technologies.

Нивната студија покажува дека настанала голема промена во глобалниот пазар на градежништво, па сега на зелените градби се гледа како на долгорочна бизнис прилика наместо како на спореден дел од пазарот.

Од компаниите кои McGraw-Hill ги анкетирале, вклучувајќи и архитекти, инженери, градежници, консултанти и инвеститори, 51% од нив планираат барем 60% од нивните идни градежни активности до 2015 година да бидат на зелени градби. За споредба, за 2012 година тоа го планирале само 28% од компаниите.

Причината за овој голем пораст не лежи во тоа што станува очигледно дека не доаѓа крајот на светот наредниот месец, па сите повторно да почнат да прават долгорочни планови, туку затоа што тоа од нив го бараат пазарот и клиентите, двата клучни фактори во градењето на бизнис стратегии.

-Во 2008 г. она што го држеше пазарот беше идејата компаниите да покажат еколошка свест со градење на вакви градби. Но, денес имаме поголема побарувачка отколку понуда за зелени градби, вели Geraud Darnis, претседател и директор на United Technologies.

Се очекува во наредните 3 години, бизнис активностите поврзани со нови градби и реновирање на старите да имаат најголема можност за остварување на ваков вид градби. Од анкетираните компании, 63% имаат планови за вклучување во нови комерцијални зелени проекти, а 50% од компаниите ќе учествуваат во реновирање на стари градби. Најмногу работа кај зелени реновирања ќе имаат фирмите во Велика Британија и во Сингапур, со 65, односно 69% соодветно.

Од друга страна, во Бразил и Обединетите Арапски Емирати, најмногу ќе се работи на нови проекти. Имено, 83% од фирмите во Бразил планирале да остварат некој нов комерцијален еколошки и енергетски прифатлив проект до 2015 г., додека во ОАЕ тој процент изнесува околу 73%.

-Моменталната состојба на пазарот во градежниот сектор на светско ниво претставува зрела можност за остварување на зелени проекти и станува очигледно дека овој начин на изградба на објектите ќе стане битен дел од идниот глобален градежен пазар и компаниите ќе мора да бидат подготвени за оваа промена – вели Harvey Bernstein, потпретседател во McGraw-Hill Constructions.

Крајниот заклучок на студијата е дека бизнис заедницата широко го прифаќа концептот на зелени градби како стратешка цел која истовремено обезбедува и општествени и еколошки поволности.