Нуклеарните централи работат на принципот на верижна реакција на фисија за добивање на нуклеарна енергија. Најголемиот трик е всушност контролирање на верижната реакција, со што енергијата би се ослободила полека и сигурно, без несакани последици.
Тајната во контролирањето на верижната реакција е контрола на неутроните. Ако можат да се контролираат неутроните, може да се контролира и енергијата која се ослободува.
Повеќето луѓе мислат дека концептот на нуклеарните централи е претерано сложен, но тоа не е така. Нуклеарните централи се многу слични со конвенционалните термоцентрали на фосилно гориво, каде се гори фозилно гориво (јаглен, мазут, гас) и топлината се користи за добивање на пареа. Потоа пареата ја покренува турбината која е поврзана за генераторот кој произведува електрична енергија.
Разликата меѓу обичните термоцентрали и нуклеарните е што во нуклеарната централа топлина се добива преку верижна реакција на нуклеарна фисија.
Во нуклеарен реактор, радиоактивно гориво (најчесто ураниум или плутониум) се става во вид на шипки во јадрото на реакторот. Контролни шипки, најчесто направени од бор или кадмиум исто така се ставаат во јадрото, а нивната задача е да ја контролираат брзината на распаѓање на горивото. Инженерите во централата можат да ја запрат верижната реакција потполно со спуштање на контролните шипки целосно во јадрото на реакторот, каде тие би ги апсорбирале сите неутрони. Со постепено повлекување на контролните шипки може да се добие посакувата топлина.
Јадрото е исполнето со течност (најчесто вода, но може да е и течен натриум) која ја апсорбира топлината произведена со нуклеарната реакција. Потоа течноста се внесува во генератор за пареа од каде пареата се одведува до парната турбина, која е поврзана со генераторот. Така се добива електрична енергија. Пареата притоа кондензира и повторно се враќа во генераторот за пареа. Со тоа се создава затворен систем, односно не се испишта ни вода ни пареа – сѐ се рециклира. Овој затрворен систем овозможува да нема озрачување (радијација) на воздухот и водата во околината.
3 Comments
Сашо
Добро е што некој се сети да му објасни на народот дека нуклеарната централа е всушност термо-централа. За жал, се плашам дека има многу подла позадина приказнава, зошто завршува многу „среќно“, а всушност го насочува народот во заблуда…
Демек, добиената енергија е чиста, нема загадување. А никој не спомнува дека Ураниумските или Плутониумските шипки, откако ќе „согорат“, магично се претвораат во нуклеарен (читај радиоактивен) отпад, кој обично завршува на депонии во земји во развој (како нашата) или некоја Афричка земја. Значи, чиста енергија, само за кого-како.
И позадината на приказнава ми звучи, како обид за замолчување или смирување на противниците на идејата – да си влезиме и ние во Чегрене. А нешто ми кажува дека Македонија е избор број еден за nuclear waste disposal од таа нуклеарна електрана.
Ве молам, во иднина кажувајте ги и негативните страни малку подетално. Една Јапонија, со врвна дисциплина и без проблеми, одеднаш едвај ги држи нуклеарните реактори под контрола. Требаше само малку виша сила (земјотрес) за сѐ да им излезе од контрола. Сега, keep it real, овде на Балканот и не е потребна виша сила. Ние сме природно неодговорни нации, и сите заедно сме природно склони на проблеми. Ако некој нам нѝ даде нуклеарна централа, тоа е исто како на дете да му се даде наполнет пиштол в раце и да му каже дека не смее да си игра со него.
Мислев дека „Енергетска ефикасност“ се залага за чиста енергија, покрај ефикасноста…
master
За предностите и недостатоците на нуклеарната енергија предвидено е утре (сабота) да се објави текст. Се разбир,а ние како блог кој се залага за чиста околина и чиста енергија сме против изградба на нуклеарна централа во Македонија, посебно земајќи ги предвид хавариите кои се случиле во многу поразвиени и технолошки понапредни земји како Јапонија или САД. Но, бидејќи нашиот блог е пред сѐ информативен, а на барање на читателите, одлучивме да ја претставиме и нуклеарната енергија како еден од начините за снабдување со електрична енергија, без некоја задна намера да ја промовираме или „продаваме“.
Борче
околу нас имаме доволно чиста енергија. само треба малку да ги отвориме очите и да бидеме дисциплинирани за да ги користиме благодетите од неа. не е потребно ниту да дебатираме за нуклеарка, а посебно не кај нас.