Пред околу два-три века едни од најпознатите и најславените изумители беа оние кои се занимаваа со алхемија – наводна наука која се занимаваше со тоа како да се претвори кој било метал во злато или сребро. Денес алхемијата не е толку во мода како што се некои други дисциплини, како што е пронаоѓањето на начин како да се произведе бесплатна енергија. Имено, доста често се случува по медиуми главна вест да биде секогаш кога некој ќе спомене дека има најдено начин да произведе бесплатна електрична енергија. Таков вид на иноватори кои сензационално објавуваат дека имаат спремна иновација која ќе го спаси светот со тоа што ќе произведе бесплатна електрична енергија се појавуваат доста често. За жал, она што е заедничко за секоја од тие иновации (досега немало исклучок) е што сите за рекордно време заминале во заборав и никој не се ни сеќава на нив. Сепак нема да се навратам на секој таков вид на иновација наназад во историјата, со оглед на тоа дека многу ги има, туку само на некои кои се скорашни, па и блиски во географска смисла.
Пред две недели актуелен беше шумадинецот кој нудеше бесплатна енергија, а кој тврдеше дека може да акумулира сончева енергија која што може да се користи долго откога ќе снема сончево зрачење или дури по неколку месеци, ако тоа е желбата и потребата на корисниците. Иако својата иновација ја има патентирано, не нѝ навести нешто за тоа како работи неговиот прототип, што само по себе буди сомнеж. Објаснувањето кое го има дадено за концентраторите не опишува, а не ни помага во разбирање на процесите на складирање на сончевата енергија. Засега единствениот познат начин за складирање на акумулирана топлина е со помош на топена сол – нешто испитано и докажано во пракса. Сепак, далеку од тоа дека тоа е совршено решение, дека нема мани, но барем функционира и на сите им е јасно како тоа работи. Со помош на топена сол може да се обезбеди максимум 15 часа контиунирана работа на една сончева централа, далеку помалку од она што го навести др. Владан Петровиќ. Логиката вели дека неговата иновација, доколку работи како што ја опишува, може да направи револуција во светот на соларната технологија. Дали ќе биде така секој нека донесе сам одлука.
Во меѓувреме, нешто после објавата на др.Владан Петровиќ, неговите јужни соседи не сакаа да останат ништо поназад и понудија свое перпетуум мобиле. Група од тројца црногорски иноватори предводени од Милан Бојовиќ презентираа уред кој произведува бесплатна енергија. Црногорците отидоа чекор понапред од нивните северни соседи со тоа што кај нив нема потреба ни од сончева ни од кој било друг вид на енергија. Се што им треба е една мала батерија која е потребна за покревање на процесите (кои се чувани како тајни, иако патентирани) и од таа иницијална енергија се добиваат поголеми количини на енергија од кои потоа повторно се полни батеријата за да биде спремна за следен циклус. Автономен механички агрегат е името на уредот кој е патентиран како таков и кој пред скоро време беше промовиран во еден кафе бар во гратчето Тиват во Црна Гора.
Според иноваторите, принципот на функционирање е следниот: батеријата од 12 волти дава електричен импулс за стартување со работа на еднонасочен електромотор, а кој преку посебен преносен систем е поврзан со генератор кој со помош на исправувач произведува 220 волти наизменичен напон. Мал дел од произведената енергија се враќа назад за полнење на батеријата, додека остатокот оди на напојување на потрошувачите кои се приклучени на уредот. Тајната на успехот според иноваторите е во системот на поврзување и системот на пренос за кој одбиваат да зборуваат иако е заштитен со патент. Она што тие го нудат за сите потенцијално заинтересирани клиенти се димензионирање, конструкција и продажба на уреди со моќност од 1 киловат до 1 мегават. Имено, „наводно” на денот на промоцијата протитопот кој беше презентиран целосно ги задоволуваше потребите за електрична енергија на кафе барот каде беше презентацијата и плус на една бушилица и брусилица. За тоа колку има вистина или не, останува да важи коментарот погоре даден за иновацијата на др. Владан Петровиќ, иако ова е доста порадикално.
Со сето ова кажано ќе биде малку невкусно ако не кажеме збор или два за тоа како ние во Македонија ќе го спасиме светот со тоа што ќе измислиме начин за добивање на бесплатна електрична енергија. Следното видео е од г-динот Војо Ушевски, според кого неговата иновација „Турбина за движење на течности и предмети по природен пат“ е вистинско перпетуум мобиле. За веродостојноста на неговите тврдења повеќе на следниот линк и од следното видео.
2 Comments
Александар
Перпетуум мобиле е идеја за уред кој работи на принцип да дава повеќе енергија отколку што се вложува. Значи уред кој работи со ефикасност поголема од 100%.
За да постои таков уред, потребно е најпрво природно да постојат предуслови за тоа, односно тоа да биде природна појава.
Dule
Fakt e deka perpetuum mobile ili postojano dvizenje masini se napraveni pred nekolku vekovi i ako se investira vo niv sigurno bi dobile besplatna energija , a site inovacii sto se vrleni vo zaborav dali se zaprasal nekoj zosto e toa taka , se razbira zosto energija proizvedena od nisto ke treba da se naplati so “nisto” znaci ne treba da se naplati. Zosto vo Amerika moze da se patentiraat sekakvi inovacii osven inovacii za besplatna energija ili perpetuum mobile (postojano dvizenje) ili kako sakate narecete go? Zaradi zakonite na termodinamikata koi se teorii koi ne se dokazani se dodeka ne se dokazat a ako se dokazat propagjaat? Kako zemjata e vo postojano dvizenje se vrti okolu zamislenata oska i okolu sonceto i toa e slucaj so drugite planeti zarem ne e toa postojano dvizenje? Znaci vo prirodata go ima i toa moze da se predizvika so pomos na samata gravitacija ili so pomos na magneti koi znaeme deka gi ima vo prirodata i mozebi na nekolku drugi nacini no sepak e vozmozno. Za dvizenjeto na planetite i za gravitacijata sekako imaat drugi zakoni koi isto taka se teorii i ne se dokazani. Zosto site naucnici koi se zanimavale so ova se proglaseni za ludi ili neznam kakvi , duri i golemiot Nikola Tesla na koj najgolem del na ova sto go imame denes mu go dolzime nemu koga pretstavil realen proekt za celosno osvetluvanje na planeteta so besplatna energija od prirodata po bezzicen prenos za koj denes znaeme deka e vozmozen , mu go otfrlile proektot kako nerealen , go proglasile za lud ili neznam kakov naucnik , mu ja zapalile labaratorijata i covekot za kratko vreme banknotiral i celiot proekt propadnal. A ova bilo nevozmozno zosto ne znaele kade treba da bide brojacot a idejata na golemiot naucnik bila da nema brojac.Vo nekoja idnina mozebi nas ke ne nema togas , covestvoto ke ja ima taa energija a dotogas izvorite na energija ke bidat glaven povod za vojna.
SO POCIT kon Golemiot Genij , Nikola Tesla – covekot koj ni ja podari energijata , a drugi ni ja naplakjaat.